काठमाडौँ । काठमाडौंमा जारी नेपाल प्रिमियर लिग (एनपीएल)मा खेलाडीलाई स्पट फिक्सिङ प्रस्ताव र अनलाइन सट्टेबाजीमा संलग्न आरोपमा १० जना पक्राउ परेका छन्। पक्राउ परेकामध्ये ९ जना भारतीय नागरिक छन्।
मंसिर ३ मा खेलाडीलाई इन्स्टाग्राममार्फत १ करोड रुपैयाँसम्मको प्रलोभन दिएको आरोपमा हरियाणाका दिलप्रित सिंह र नेपाली रेविका सिंह ठकुरी पक्राउ परे। मंसिर ६ मा कीर्तिपुरको त्रिवि मैदानबाट ‘स्टेक डटकम’ र ‘बेटबुक डटकम’मार्फत करिब २ करोड ५ लाख रुपैयाँ बराबरको सट्टेबाजी गरिरहेको ८ भारतीयको समूह पक्राउ गरिएको प्रहरीले जनाएको छ।
आईसीसी र प्रहरी दुवैले निगरानी कडा पारेका छन्। तर विशेषज्ञहरूका अनुसार साइबर अपराध रोकथाममा राज्यको लगानी अझै कमजोर छ। नेपालमा यसअघि पनि २०७२ मा फुटबल खेलाडीहरू म्याच फिक्सिङ आरोपमा समातिएका थिए।