काठमाडौं। सञ्चार तथा सूचना प्रविधि मन्त्रालयले आफ्ना मातहतका निकाय र कार्यरत कर्मचारीहरूका लागि ९ बुँदे नयाँ आचारसंहिता जारी गरेको छ। बुधबार जारी गरिएको उक्त आचारसंहिताले कर्मचारीहरूलाई थप जिम्मेवार, अनुशासित र सेवाग्राहीमैत्री बनाउने लक्ष्य राखेको छ।
आचारसंहिताको पहिलो सर्तका रूपमा कर्मचारीहरूले मुलुकको संविधान, प्रचलित नीति तथा कानुनको पूर्ण पालना गर्नुपर्ने व्यवस्था गरिएको छ। साथै, सरकारले तोकेको समयमा अनिवार्य कार्यालय हाजिर हुनुपर्ने र पूर्वस्वीकृति नलिई बिदामा बस्न नपाइने नियमलाई मन्त्रालयले कडाइका साथ अघि सारेको छ।
मन्त्रालयले कर्मचारीहरूको पहिचान र व्यावसायिकतालाई मध्यनजर गर्दै कार्यालय समयमा अनिवार्य रूपमा तोकिएको ड्रेसकोड पालना गर्नुपर्ने र आफ्नो परिचयपत्र सबैले देख्ने गरी लगाउनुपर्ने निर्देशन दिएको छ। कार्यसम्पादनको हकमा कुनै पनि जिम्मेवारीलाई सोही दिन वा बढीमा भोलिपल्टसम्म सम्पन्न गरिसक्नुपर्ने र काममा ढिलाइ वा द्विविधा भएमा तत्कालै सम्बन्धित सुपरीवेक्षकलाई जानकारी गराउनुपर्ने प्रावधान राखिएको छ। यसैगरी, कुनै पनि टिप्पणी वा निर्णय प्रक्रिया सुरु गर्ने कर्मचारीले त्यसको नियमित फलोअप गरी सुपरीवेक्षकलाई अवगत गराउनुपर्ने र आफ्ना कार्यहरूलाई छिटो, छरितो र गुणस्तरीय बनाउन सदैव प्रयत्नशील रहनुपर्ने विषयलाई पनि आचारसंहितामा प्राथमिकता दिइएको छ।
सेवा प्रवाहलाई समावेशी र मानवीय बनाउन मन्त्रालयले वृद्ध, अशक्त, अपाङ्गता भएका व्यक्ति, सुत्केरी, गर्भवती महिला, बालबालिका र असहायलाई पहिलो प्राथमिकता दिनुपर्ने अनिवार्य व्यवस्था गरेको छ। यसका साथै कर्मचारीहरूले आफ्नो कार्यकक्ष र कार्यालय परिसरको सरसफाइमा ध्यान दिनुपर्ने तथा उपलब्ध स्रोत र साधनको अधिकतम मितव्ययी एवं प्रभावकारी प्रयोग गर्नुपर्ने उल्लेख छ। मन्त्रालयले यस आचारसंहिताको पालनाका लागि सम्बन्धित कर्मचारीहरूबाट लिखित प्रतिबद्धता समेत लिएको छ, जसले सरकारी सेवाको विश्वसनीयता र पारदर्शिता अभिवृद्धि गर्ने अपेक्षा गरिएको छ।