काठमाडौँ । नेपाल बाल संगठन (बाल मन्दिर) को सम्पत्ति तथा छात्रवृत्ति कोषमा भएको व्यापक अनियमितता र ठगी प्रकरणमा संलग्न रहेको आरोपमा आठ जनाविरुद्ध औपचारिक रूपमा अदालतमा मुद्दा दायर भएको छ। नेपाल प्रहरीको केन्द्रीय अनुसन्धान ब्यूरो (सीआईबी) ले लामो समयदेखि गर्दै आएको विस्तृत अनुसन्धान प्रतिवेदनका आधारमा सरकारी वकिल कार्यालयमार्फत काठमाडौँ जिल्ला अदालतमा ठगी कसुरअन्तर्गत अभियोगपत्र दर्ता गरिएको हो।
बाल संगठन जस्तो ऐतिहासिक र संवेदनशील संस्थामा भएको यस किसिमको आर्थिक गम्भीर अनियमितताले शैक्षिक तथा सामाजिक क्षेत्रमा ठूलो तरंग पैदा गरेको छ। सीआईबीका अनुसार प्रतिवादी बनाइएकाहरूमा नेपाल बाल संगठन काठमाडौंका तत्कालीन योजना तथा छात्रवृत्ति शाखा प्रमुख ५४ वर्षीया आशा श्रेष्ठ, संगठनका तत्कालीन सचिव ५१ वर्षीय राजेन्द्र कुमार श्रेष्ठ, र तत्कालीन सभापतिहरू ६२ वर्षीय ओमकृष्ण कर्माचार्य तथा युरी कुमारी राई रहेका छन्। यसैगरी, तत्कालीन कोषाध्यक्षद्वय ७४ वर्षीय दीपकदास श्रेष्ठ र ६० वर्षीय प्रयागराज श्रेष्ठ, अर्का तत्कालीन सभापति ६३ वर्षीय भगवान शाक्य तथा तत्कालीन सल्लाहकार ५६ वर्षीय रामकृष्ण चित्रकारविरुद्ध पनि ठगी मुद्दा चलाइएको छ। अभियोग लागेका आठ जनामध्ये आशा श्रेष्ठ, राजेन्द्रकुमार श्रेष्ठ र ओमकृष्ण कर्माचार्य मात्र हाल प्रहरीको फन्दामा परेका छन् भने बाँकी पाँच जनालाई फरार प्रतिवादीका रूपमा सूचीकृत गरी अदालतमा मुद्दा अघाइएको छ।
यस बहुचर्चित प्रकरणको पृष्ठभूमि हेर्दा, उच्च अदालतका पूर्वमुख्यन्यायाधीश हरिबाबु भट्टराईको अध्यक्षतामा गठन भएको एक उच्चस्तरीय छानबिन आयोगले २०७७ सालमै सरकारलाई विस्तृत प्रतिवेदन बुझाएको थियो। तर लामो समयसम्म उक्त प्रतिवेदन राजनीतिक दबाब र प्रशासनिक सुस्तताका कारण थन्किएर बसेको थियो। गत चैत महिनामा मात्रै वर्तमान मन्त्रिपरिषद्ले सो प्रतिवेदन कार्यान्वयनमा ल्याउने कठोर निर्णय गरेपछि सीआईबीले यसको फाइल फेरि खोलेर तीब्र अनुसन्धान अगाडि बढाएको थियो। अनुसन्धानको क्रममा बाल मन्दिरको स्वामित्वमा रहेका बहुमूल्य जग्गा, छात्रवृत्ति कोषको रकम र विभिन्न परियोजनाका नाममा भएको आर्थिक घोटालामा यी पदाधिकारीहरूको प्रत्यक्ष संलग्नता रहेको खुलेको प्रहरीको दाबी छ।
बाल संगठनका नाममा आएका विभिन्न अनुदान, छात्रवृत्ति रकम र संस्थागत सम्पत्तिलाई व्यक्तिगत लाभका लागि दुरुपयोग गरी ठगी गरिएको ठहरसहित अभियोग दायर भएपछि अब अदालतमा नियमित कानुनी प्रक्रिया सुरु हुनेछ। पक्राउ परेका प्रतिवादीहरूसँग बयान लिने तथा फरार रहेका अन्य पाँच जनालाई पक्राउ गर्ने प्रक्रिया अझै तीव्र पारिने सीआईबीले जनाएको छ।