काठमाडौं । संवैधानिक निकाय निर्वाचन आयोगले नयाँ नेतृत्व पाउने निश्चित भएको छ। संसदीय सुनुवाइ समितिले प्रमुख निर्वाचन आयुक्तका रूपमा प्रस्तावित मानबहादुर कार्कीसहित दुई आयुक्तहरूको नाम सर्वसम्मत रूपमा अनुमोदन गरेको छ। यससँगै आयोगको सर्वोच्च कमान्ड सम्हाल्न सिफारिस भएका सबै पदाधिकारीहरूले संसदीय ‘परीक्षा’ सफलतापूर्वक पार गर्दै औपचारिक नियुक्तिका लागि हरियो झण्डा पाएका छन्।
सिंहदरबारमा बसेको संसदीय सुनुवाइ समितिको बैठकले प्रमुख निर्वाचन आयुक्तमा कार्की र आयुक्तहरूमा गुरु वाग्ले तथा डा. राजीव सुब्बाको नाम विनाकुनै विरोध स्वीकृत गरेको हो। समितिमा उपस्थित भई आफ्नो कार्ययोजना र मार्गचित्र प्रस्तुत गरेका प्रमुख आयुक्त कार्कीको सुनुवाइ अन्तिम दिन भएको थियो भने आयुक्तद्वय वाग्ले र सुब्बाको सुनुवाइ अघिल्लो दिन नै सम्पन्न भइसकेको थियो। संसदीय सुनुवाइमा सांसदहरूले उठाएका प्रश्नको स्पष्ट जवाफ दिँदै कार्यकुशलता प्रदर्शन गरेपछि समितिले उनीहरू तीनै जनालाई सर्वसम्मत अनुमोदन गरेको हो।
संसदीय समितिबाट नाम अनुमोदित भएसँगै अब राष्ट्रपतिबाट औपचारिक नियुक्ति र पद तथा गोपनीयताको शपथ ग्रहणको बाटो खुलेको छ। देशमा आवधिक निर्वाचन निष्पक्ष, धाँधलीरहित र विश्वसनीय ढङ्गले सम्पन्न गराउने प्रमुख दायित्व बोकेको संवैधानिक निकायमा नयाँ टोलीको आगमनले निर्वाचन व्यवस्थापनलाई थप प्रविधिमैत्री, पारदर्शी र आधुनिक बनाउने विश्वास लिइएको छ।