काठमाडौँ। संघीय संसद्मा आगामी आर्थिक वर्षको नीति तथा कार्यक्रममाथिको छलफल सुरु हुनै लाग्दा विपक्षी सांसदहरूले प्रधानमन्त्री बालेन्द्र शाहको राजीनामा माग गरेका छन्। सरकारको नीति तथा कार्यक्रममाथि उठेका प्रश्नहरूको जवाफ दिन प्रधानमन्त्री स्वयं उपस्थित हुनुपर्नेमा उनी अनुपस्थित भएपछि विपक्षी दलहरू आक्रोशित बनेका हुन्। आजको कार्यसूची अनुसार नीति तथा कार्यक्रममाथि छलफल थाल्ने तयारी रहे पनि प्रधानमन्त्रीको साटो अर्थमन्त्री डा. स्वर्णिम वाग्लेले जवाफ दिन खोजेपछि संसद्मा अवरोध सिर्जना भएको हो।
विपक्षी सांसदहरूले प्रधानमन्त्रीको खोजी गर्दै विरोध प्रदर्शन गरेपछि संसद्को बैठक प्रभावित भएको छ। आफ्नै सरकारको मुख्य कार्यक्रममा प्रधानमन्त्री जिम्मेवार नभएको र संसद्लाई उपेक्षा गरेको आरोप लगाउँदै उनीहरूले बालेन शाहले तत्काल पदबाट राजीनामा दिनुपर्ने माग अघि सारेका छन्। प्रधानमन्त्री नआएसम्म सदनको कारबाही अघि बढ्न नदिने अडानका साथ विपक्षीले संसद्मै प्रधानमन्त्रीको राजीनामा मागेपछि राजनीतिक माहोल थप तातेको छ।