काठमाडौँ । सर्वोच्च अदालतले मेडिकल व्यवसायी दुर्गा प्रसाईंमाथि दोस्रो पटक म्याद थप गरिएको अवधिभित्रै अनुसन्धान सम्पन्न गर्न आदेश दिएको छ। प्रसाईंका तर्फबाट सर्वोच्चमा दायर गरिएको बन्दी प्रत्यक्षीकरणको रिटनिवेदनमाथि गहन सुनुवाइ गर्दै न्यायाधीशद्वय विनोद शर्मा र नित्यानन्द पाण्डेयको संयुक्त इजलासले यस्तो परमादेश जारी गरेको हो।
अदालतको यो आदेशसँगै अब प्रहरीले तोकिएको समयसीमाभित्रै प्रसाईंमाथिको अनुसन्धान टुङ्ग्याउनुपर्ने कानुनी स्थिति बनेको छ। जिल्ला प्रहरी कार्यालय पर्साले प्रसाईंविरुद्ध गत बिहीबार दोस्रो पटक चार दिनको म्याद थप गरेर हिरासतमा राखेको थियो। पर्सा प्रहरीका सूचना अधिकारीका अनुसार दोस्रो पटक थप गरिएको उक्त म्याद आगामी सोमबार सकिँदैछ। मेडिकल व्यवसायी प्रसाईंलाई प्रहरीले पर्साबाट पक्राउ गरेको थियो र उनी हाल पर्सा प्रहरीकै हिरासतमा रहेका छन्।
संयुक्त इजलासले जारी गरेको आदेशमा आगामी सोमबारभित्र अनुसन्धान पूरा गरी उनीविरुद्ध मुद्दा चल्ने वा नचल्ने भन्नेबारे अन्तिम निर्णय लिन निर्देशन दिइएको छ। तोकिएको उक्त अवधिभित्र अनुसन्धान सकेर मुद्दा चलाउने निर्णय भएमा सोही बमोजिम प्रक्रिया अगाडि बढाउन र यदि सो समयभित्र निर्णय हुन नसकेमा उनलाई हिरासतमा नराखी तत्कालै थुनामुक्त गर्न गराउन समेत सर्वोच्च अदालतले स्पष्ट आदेश दिएको छ।