काठमाडौं । भक्तपुरको नलिन्चोकस्थित हेलिप्याड निर्माणमा गम्भीर अनियमितता भएको आशंकामा नागरिक उड्डयन प्राधिकरण (कन्ट्रोल) का महानिर्देशक प्रदीप अधिकारी पक्राउ परेका छन्। अख्तियार दुरुपयोग अनुसन्धान आयोगले बुधबार अधिकारीसहित पूर्व महानिर्देशक मुरारी भण्डारीलाई नियन्त्रणमा लिएर विशेष अदालतमा उपस्थित गराएको हो।
अख्तियारका अनुसार नलिन्चोकमा प्राधिकरणको स्वामित्वमा रहेको करिब ३२ रोपनी जग्गामा बनाइएको हेलिप्याड निर्माण क्रममा नियमविपरीत कार्य भएको उजुरी परेपछि अनुसन्धान अघि बढाइएको थियो। वातावरणीय प्रभाव मूल्यांकन (EIA) नगरी निर्माण कार्य थालिएको, निर्माण प्रक्रियामा वित्तीय अनियमितता भएको तथा परियोजनाको औचित्यसमेत स्पष्ट नभएको गुनासो दर्ता भएपछि दुवैलाई पक्राउ गरिएको आयोगले जनाएको छ।
नलिन्चोक हेलिप्याडको उद्घाटन ७ असार २०८१ मा तत्कालीन पर्यटनमन्त्री हितबहादुर तामाङ र महानिर्देशक अधिकारीले संयुक्त रूपमा गरेका थिए। त्यसपछि प्रोजेक्टको लागत, आवश्यकतासमेतबारे निरन्तर प्रश्न उठ्दै आएका थिए।
विशेष अदालतले आयोगद्वारा दर्ता गरिएको भ्रष्टाचार मुद्दा दर्ता भएको पुष्टि गरेको छ। अदालतका अनुसार कुल ६ जना र एक संस्थाविरुद्ध मुद्दा पेस गरिएको छ। पक्राउ परेकामध्ये दुईजना आयोगको नियन्त्रणमा छन् भने बाँकी अन्य फरार रहेको अदालतले जनाएको छ।
अख्तियारले घटनालाई गम्भीर प्रकृतिको अनियमितता भन्दै आवश्यक कानुनी कारबाही अघि बढाइएको बताएको छ।