काठमाडौं। नेपाली कांग्रेसका प्रभावशाली नेता तथा पूर्व ऊर्जामन्त्री दीपक खड्कालाई प्रहरीले नियन्त्रणमा लिएको छ। विशेष स्रोतका अनुसार, खड्कालाई सम्पत्ति शुद्धीकरणको गम्भीर मुद्दामा अनुसन्धान गर्नका लागि पक्राउ गरिएको हो। लामो समयदेखि विभिन्न विवादमा मुछिएका खड्का अन्ततः कानुनी घेरामा परेका छन्।
खड्काको पक्राउको मुख्य कारण लैनचौरस्थित नेपाल स्काउटको बहुमूल्य जग्गा विवाद रहेको बताइएको छ। स्काउटको जग्गा हडपेको र व्यावसायिक प्रयोजनमा अनियमितता गरेको आरोप उनीमाथि लाग्दै आएको थियो। यसका साथै, उनको आर्थिक कारोबार र सम्पत्तिको स्रोतमाथि राज्यका निकायले सूक्ष्म निगरानी गरिरहेका थिए, जसको परिणामस्वरुप आज उनलाई नियन्त्रणमा लिइएको हो।
यो प्रकरणमा अर्को एउटा रोचक तर विवादास्पद पक्ष ‘जेनजी आन्दोलन’ सँग जोडिएको छ। आन्दोलनका क्रममा खड्काको निवासमा आगजनी हुँदा घरबाट नोटका बिटाहरु हावामा उडेको दृश्यसहितको भिडियो सामाजिक सञ्जालमा भाइरल भएको थियो। सर्वसाधारण र अनुसन्धान अधिकारीहरूका लागि त्यो दृश्य अनपेक्षित थियो। सोही भिडियोमा देखिएको अकुत धनराशिको स्रोत के हो भन्ने विषयमा सम्पत्ति शुद्धीकरण विभागले गम्भीरतापूर्वक अनुसन्धान गरिरहेको छ।