धरान । धरान उपमहानगरपालिकाका मेयर हर्कराज राई (साम्पाङ) ले कोसी प्रदेशका भौतिक पूर्वाधार विकास मन्त्री भूपेन्द्र राईको नेतृत्वमा धरान नगर क्षेत्रको रातारात कालोपत्रे कार्यको छानबिन गर्न अख्तियार दुरुपयोग अनुसन्धान आयोगमा औपचारिक पत्र लेखेका छन्। मेयर राईले सो कार्यको गुणस्तर र पारदर्शिता माथि गम्भीर प्रश्न उठाउँदै, यसलाई अनुसन्धान गर्न आग्रह गरेका छन्।
साम्पाङका अनुसार, शनिवार राति ९ बजे देखि ३ बजेसम्म, कुनै पूर्वसूचना बिना, धरानको वडा नम्बर ४ र १५ बीचको काठे पुलमा सडक कालोपत्रे गरिएको छ। उनले पत्रमा लेखेका छन् कि नगरपालिकालाई जानकारी नगरिकन यस्तो कार्य गर्नु अनौचित्यपूर्ण रहेको छ, जसले नगरवासी र स्थानीय प्रशासनको बीचमा विश्वासको आभाव पैदा गर्ने छ।
मेयर राईले रात्रिकालीन समयमा सडक कालोपत्रेको काम गर्दा पर्याप्त प्रकाश नपाउने र यसको प्रभावले कामको गुणस्तरमा नकरात्मक असर पर्न सक्ने आशंका व्यक्त गरेका छन्। उनले भने, यस प्रकारको काम नगरपालिकाको अनुमतिको बिना गर्नाले, यसमा अनियमितताका संकेतहरू देखिन्छन्।
साथै, मेयर राईले यस प्रकारका गुणस्तरीय र पारदर्शी कार्यहरूको सुनिश्चितताका लागि अख्तियारसँग कडाइका साथ छानबिन गर्न आग्रह गर्दै, भविष्यमा यस प्रकारका कार्यमा रोक लगाउन कानूनी प्रक्रियामा सुधार ल्याउने आवश्यकता औँल्याएका छन्।
