काठमाडौँ । नेपाली कांग्रेसभित्र केन्द्रीय कार्यसमितिको वैधानिकतालाई लिएर विवाद जारी रहेकै बेला संस्थापन इतर समूहले १५ औँ महाधिवेशनका लागि छुट्टै कार्यतालिका सार्वजनिक गर्ने घोषणा गरेको छ। १५ औँ केन्द्रीय महाधिवेशन तयारी समितिका संयोजक डा. शशांक कोइरालाले विज्ञप्ति जारी गर्दै चौधौँ महाधिवेशनबाट निर्वाचित वैधानिक कार्यसमितिले नै १५ औँ महाधिवेशनको प्रक्रिया यथाशीघ्र अघि बढाउने स्पष्ट पारेका हुन्।
पार्टीको केन्द्रीय कार्यसमितिको आधिकारिकतासम्बन्धी मुद्दा सर्वोच्च अदालतमा विचाराधीन रहेको र विधान तथा संविधान अनुसार वर्तमान कार्यसमितिको पदावधि सकिन लागेकाले महाधिवेशन अपरिहार्य भएको इतर पक्षको भनाइ छ। आगामी वैशाखमा हुने स्थानीय तह निर्वाचन र त्यसलगत्तै तय हुने प्रदेश सभा निर्वाचन अगावै पार्टीलाई सुदृढ बनाउन महाधिवेशन अनिवार्य भएको उल्लेख गर्दै डा. कोइरालाले क्रियाशील सदस्यता व्यवस्थापन, छानबिन र निर्वाचन समिति गठन लगायतका प्रक्रिया पूर्व निर्धारित कार्यतालिका अनुसार नै अगाडि बढाइने जानकारी दिएका छन्।
विज्ञप्तिमा विशेष महाधिवेशनबाट बनेको भनिएको स्वघोषित कार्यसमितिले सञ्चालन गर्ने कुनै पनि अधिवेशन वा महाधिवेशनसम्बन्धी गतिविधिमा सहभागी नहुन मातहतका सबै तहका कार्यकर्ताहरूलाई आग्रह गरिएको छ। अदालतले रोक नलगाएसम्म वैधानिक नेतृत्वले नै १५ औँ महाधिवेशन गराउने अडान राख्दै इतर समूहले सम्मानित अदालतबाट न्याय पाउनेमा पूर्ण विश्वास व्यक्त गरेको छ। यसका साथै, गत भदौ १० गते रसुवाको भोटेकोशीमा आएको बाढीले पुर्याएको जनधनको क्षतिप्रति गहिरो दुःख व्यक्त गर्दै विज्ञप्ति मार्फत बेपत्ताको खोजी, उद्धार र राहत कार्यमा तीव्रता दिन सरकारको ध्यानाकर्षण गराउनुका साथै मानवीय सेवामा जुट्न पार्टी कार्यकर्ताहरूलाई आह्वान समेत गरिएको छ।
